എനിക്കുണരേണ്ട

 മകളുറങ്ങുകയാണ്..
കണ്മഷിക്കണ്ണുകൾ, 
കരിവളക്കൈത്തണ്ടുകൾ,
കറുത്ത സുന്ദരിപ്പൊട്ട്.

എനിക്കുണരേണ്ട,
തണുത്ത നെറ്റിയിൽ മുത്തം കൊടുക്കേണ്ട,
എന്നെ കാണാത്ത കൺകൾ 
മനസ്സിലേറ്റണ്ട.

അമ്മക്കഥകളിലുണ്ടെന്റെയച്ഛൻ 
മഞ്ഞിന്റെ സ്പർശമാണെന്റെയച്ഛൻ
മഴയുടെ താളമാണച്ഛൻ
താരാട്ടിൻ ഈണമാണച്ഛൻ

എനിക്കുണരേണ്ട,
ഈ ചിത്രങ്ങൾ മായ്ക്കേണ്ട.

സ്വപ്നങ്ങളിൽ
അച്ഛനെ കെട്ടിപ്പിടിച്ച്,
ആ കൈത്തലോടലിന്റെ 
താളത്തിൽ, അലിഞ്ഞലിഞ്ഞ്,
ഞാനൊന്ന് മയങ്ങട്ടെ..

എനിക്കുണരേണ്ട ..